Чӑваш чĕлхи таса ҫӑл куҫĕ

Тапса тӑмасть шарлаттарса.

Тӗнчен пуҫламӑшӗ ҫук. Вӗҫӗ

Пурах таҫти хӑяматра.

Ҫӳлти хуҫан пӗр шелсӗр хӗҫӗ

Хуҫаланан шывпа вутра.

Чӑваш чӗлхи — чӑваш тӗнчи(йӗ)

Кашни чӑваш — вӑл хӑй тӗнче.

Ют йыш тивертнӗ вут пуҫҫийӗ

Ҫунмасть чӑваш вучахӗнче.

Паян тӗнче пичечӗ Анӑҫ —

Халӑхӑмӑн малашлӑх ҫук.

Ҫӳлти Атте! Парсамччӗ шанӑҫ —

Халӑхӑм(ӑр)а унсӑр ҫул ҫук.

Вырӑсланать хула чӑвашӗ,

Пиншер чӑваш тухать ютта.

Ертӳҫӗ ҫук! Ватти те яшӗ,

Кашни хӑй ҫулӗпе утать.

Ҫапла чухӑнланать ӑс-пурлӑх,

Куллен йӑшать чӑваш ани.

Ан сик, чӑваш, хӑвӑн пуҫ урлӑ:

Чӑвашлӑх вӑл — Турӑ пани.

Хам чӗлхемпех эп калаҫасшӑн

Хамӑн тӑван халӑхӑмпа.

Ҫӳп татки мар эп, Ҫын пуласшӑн

Ҫак тӗнчере чӑваш ятпа.

Ку тӗнчере хӑна кӑна эп,

Чун канӑҫне шырап ӗҫре.

Ӗҫле, ӗҫле текех йӳтетӗп —

Тур канлӗх пар леш тӗнчере.

Шӑпам ҫитсен хама пӳрнийӗ

Чунӑм тухсассӑн ӑшӑмран,

Тăпрам ҫинче чӑваш ҫынни(йӗ)

Вулатӑр кӗвӗ чӑвашла.

Эй, халӑхӑм, йӑхташӑм, пӗлччӗ:

Чӗлхе — вӑл иксӗлми тупра.

Чӗлхемӗре пӗтме ан парччӗ.

Чӗлхеҫӗм, халӑхна упра!

Халӑхӑма, тӑван чӗлхеҫӗм,

Илемупе имле, сыват.

Вут кайӑклӑн вӗҫсе, чӗкеҫӗм,

Хӗлхемӳпе ҫулне ҫутат.

Хӗвел тӗнчи — вӑл Анӑҫ-Тухӑҫ.

Тӗнчен варри, хӗрри те ҫук.

Тӗнче тӗревӗ — тӑнӑҫ пурнӑҫ.

Тӗнче элемӗ — ҫураҫу.

ÇЕМЕН ЭРЕШ