Юпан 27-мĕшĕнче Тутарстанра чăваш наципе культура автономийĕн VII отчетпа суйлав конференцийĕ иртрĕ. Унта культура автономийĕн представителĕсемсĕр пуçне вырăнти влаç органĕсенчи çынсем те хутшăнчĕç. Чăваш Енрен те элчĕсем пулчĕç — культура министрĕн çумĕ Татьяна Казакова, «Янра юрă» ансамбль. Татьяна Казакова Чăваш Ен президенчĕн, Николай Федоровăн, салам сăмахĕсене вуласа пачĕ.

Конференцире Тутарстан чăвашĕсен умĕнче тухса тăракан çивĕч ыйтусене сӳтсе яврĕç. Çитĕнӳсем пирки те манса каймарĕç — «Учӳк», «Уяв» ирттересси, çамрăксемпе ĕçлесси кунта йăлана кĕнĕ ĕнтĕ.

Суйлавра культура автономине малашне ертсе пыма унчченхи пекех Константин Яковлева шанса пачĕç.

Чăваш Енрен çитнĕ «Янра юрă» (сăмах май, ăна Чăваш Республикин халăх артисчĕ Вячеслава Христофоров ертсе пырать) конференцине пухăннă çынсене юрăпа савăнтарчĕ.