Çак ятпа Шупашкарти "Перфектум" издательствăра нумаях пулмасть çĕнĕ кĕнеке пичетленсе тухрĕ. Тиражĕ-200 экземпляр. Авторĕ — пирĕн ентеш, Çĕньял Шетмĕ ялĕнче 1925 çулта çуралнă Е. А. Маркова. Унăн ашшĕ — Антон Осипович 1942 çулта Ржев хули çывăхĕнчи пĕр çапăçура пуç хунă. 5 ачана амăшĕ — Агафия Семеновна пăхса çитĕнтернĕ. Елена Антоновнан (вăл пединститутра вĕреннĕ, Карай шкулĕнче вăй хунă) педагогикăри ĕç стажĕ — 44 çул, ăна "Тăван çĕр-шывăн 1941—1945 çулсенчи Аслă вăрçи вăхăтĕнче хастар ĕçленĕшĕн" тата юбилей медалĕсемпе, нумай Хисеп грамотипе чысланă.
Çамрăклăхĕ вăрçă çулĕсемпе пĕр килнĕрен-тĕр Е. А. Маркова ку темăна çутатма суйласа илнĕ. Кĕнекен тĕп геройĕсем — Карай тăрăхĕнче ÿт илсе çунатланнă çынсем. Вĕсем пурте хăйне евĕр паттăрсем теес килет.
Тăван çĕр-шывăн иртнĕ хаяр вăрçинче Аслă Çĕнтерÿ тунăранпа 65 çул тултарнине уявланă кунсенче халăх патне çитнĕ 355 страницăллă кĕнеке икĕ пайран (сыпăкран) тăрать. Пĕрремĕшĕнче вăрçăран Карай енне таврăнман салтаксен списокĕпе, фронтра пулнисемпе, вĕсем пирки каласа панисемпе, тыл ĕçченĕсен, вăрçă ачисемпе мăнукĕсен аса илĕвĕсемпе паллашма пулать. Автор çырнисемпе унăн комментарийĕсем те самай чылай.
Иккĕмĕш сыпăка вăрçă вăхăтĕнче тата ун хыççăнхи çулсенче Карай шкулĕнчи чăваш чĕлхипе литературин кружокне çÿрекенсем алăпа çырса тăнă "Çăлтăр" журналтан çырса илнисем кĕнĕ. Халапсем те, очерксем те, сăвăсем те пур.
Ман шутпа, иртнĕ вăрçă теми патне таврăнса тата çак кĕнекене кăларса Елена Антоновна пысăк ĕç тунă. Вăл хальхи тата пулас ăрусемшĕн калама çук пысăк пĕлтерĕшлĕ.