Районти Н. Янкас ячĕллĕ культурăпа искусство тата литература пĕрлĕхĕн правленийĕпе Чăваш наци конгресĕн районти уйрăмĕн членĕсен пĕрлехи ларăвĕ пулчĕ. Унта тĕп ыйтусемпе Чăваш наци конгресĕн районти уйрăмĕн тата Н. Янкас ячĕллĕ пĕрлĕхĕн правленийĕн председателĕсем З. Михайловапа И. Прокопьев тухса каларĕç. Вĕсене тĕплĕн тишкерсе сỹтсе явнă хыççăн ларура пуш уйăхĕн 2-мĕшĕнчи 10 сехетре районти Культура çуртĕнче “Янкас вулавĕсем” ăслăлăхпа таврапĕлỹ конференцийĕ ирттерме, каçхине 18 сехет те 30 минутра кунтах районти Н. Янкас ячĕллĕ премин çĕнĕ лауреачĕсене чыслама йышăнчĕç, конференци тематикине, тухса калаçакансене, асăннă мероприятисене йĕркелесе ирттерессишĕн яваплисене палăртрĕç. Раççейри — Экологи, Чăваш Енри Амăшĕпе Ашшĕн çулталăкĕнчи культурăпа çыхăннă мероприятисен планĕ Трак енре çав тери анлă. Ларура, ав, кăçал литературăра, поэзире, журналистикăра, юрăпа ỹнер искусствинче вăй хуракансен юбилейĕсене паллă тăвассипе çыхăннă ыйтăва та хускатрĕç. Унсăр пуçне ларура пулнисем пуш уйăхĕн 30-мĕшĕнче, кĕçнерникун, каçхине 18 сехет те 30 минутра районти Культура çуртĕнче “Шетмĕпе Çавал кĕввисем” XIX фестиваль ирттерме калаçса килĕшрĕç. Çывăхри тĕллевсем паллă: янкасçăсемпе конгресçăсен çанă тавăрса хĕрỹ ĕçе кỹлĕнмелле çеç!

В. Данилов.