Пирĕн ентеш—Яманакăн пултаруллă арĕ — Эдисон Патмар кĕнеке хыççăн кĕнеке калăплать. 
Шупашкарти "Çĕнĕ вăхăт” издательствăра нумаях пулмасть унăн 140-мĕш кĕнеки 1500 экземпляр тиражпа пичетленсе тухрĕ. Иккĕмĕш авторĕ — ашшĕ — чăваш халăх сăмахлăхне пухассипе палăрнă Иван Анисимович Патмар. 
Сăмах май, çак ĕç — Патмарсен пуххинчи 10 томлă халăх сăмахлăхĕн 7-мĕш томĕ. 228 страницăран тăракан илемлĕ те хытă хуплашкаллă кĕнекен ум сăмахĕнче ку тома чăваш арçынĕсене халалланине асăннă. Хайлавсенче салтакăн çăмăл мар пурнăçĕ пирки тĕплĕн çырса кăтартнă. Урăхла пулма та пултараймасть, мĕншĕн тесен Эдисон Иванович хăй те салтак пăттине тутаннă, 20 çул ытла çар хĕсметĕнче пулнă. Ашшĕ — Иван Анисимович вара — иртнĕ хаяр вăрçа хутшăннă, старшина, тăватă хутчен аманнă, икĕ хут — Хĕрлĕ Çăлтăр орденне, "Паттăрлăхшăн”, "Варшавăна ирĕке кăларнăшăн” тата ытти медальсене тивĕçнĕ. "Эх, мăнтарăн, нушалантăн, çавах ырă пулаймарăн, хăв ятна сыхлаймарăн...” пая шăпах унăн аса илĕвĕсене кĕртнĕ. 
"...çÿлтен кĕркуннехи курак кĕтĕвĕ пек фашист самолечĕсем пуç тăррине бомбăсем акаççĕ. Витререн шыв тăкнă пек мина, снаряд тăкăнать. Пуçа йăтса сывлама çук, тар, тĕтĕм шăрши. Ротăран виçĕ салтак кăна юлтăмăр...”, — çырнă И. Патмар хăйĕн ал çырăвĕсенче. Кунтах сăвăсем те пур:

"...Хавшак тесе ан шутлăр, 
Ура амансан аллăм пур, 
Ал амансан шур шăл пур...”

"Чăваш салтакĕ Аслă Отечественнăй вăрçă вăхăтĕнче” тата ытти пайсенче те вуласа пĕлмелли сахал мар. Историлле страницăсене те, салтак юррисене те вырăн панă. Кĕнекене сăн ÿкерчĕксем те илемлетеççĕ. 
Ман шутпа, çак кĕнекене вулакана сĕнсе авторсем халăхшăн питех кирлĕ ĕç тунă. Унăн пĕлтерĕшĕ çамрăк ăрăва патриотла воспитани парас çĕрте те калама çук пысăк. 

В. Данилов