 А.Г.Григорьевăн пултарулăх выставкиМăн Шетмĕри вăтам шкулта вĕренекенсем хăйсен мухтавлă ентешĕ Алексей Григорьевич Григорьев профессор, ЧНА академикĕ çуралнăранпа 80 çул çитнине чыслăн паллă турĕç.
А. Г. Григорьев кунта вĕреннĕ, аслă пĕлÿ илсе Шупашкарти ÿнерпе графика факультетне уçассишĕн чылай вăй хунă. Каярах асăннă факультет деканĕнче чĕрĕк ĕмĕр ытла тăрăшнă, Чăваш Енри тата Атăл тăрăхĕнчи республикăсемпе облаçсенчи шкулсем валли ÿнерпе технологи педагогĕсем çĕршер хатĕрленĕ. Çав хушăрах искусство ĕçченĕсен пултарулăхне тишкерсе кĕнеке-буклет, тĕпчев-шырав ĕçĕ пичетлесе кăларать. Вăл тĕп хулари ентешлĕхĕн "Трак ен" пĕрлешĕвне вунă çул ытла ертсе пынă. Сăпайлă та ĕçчен ентешĕмĕр чĕри 2000 çулхи августра тапма чарăннă.
Шкула пухăннисене Мăн Шетмĕри культура аталанăвĕпе вулавăш тивĕçтерĕвĕн центрĕн директорĕ Р. Г. Герасимова А. Г. Григорьев ĕçĕ-хĕлĕпе пурнăçĕ çинчен электронлă презентаци йĕркелерĕ. Раиса Гурьевна ун тăрăх ачасен пĕлĕвне викторинăра тĕрĕслерĕ.
Асăну мероприятийĕнче А. Александрова тата хĕр ачасен ушкăнĕ А. Г. Григорьева халалланă сăвăсен ярăмĕпе паллаштарчĕç. Чăваш Республикин искусствăсен тава тивĕçлĕ ĕçченĕн пултарулăхĕпе паллаштаракан выставка ĕçлерĕ.
А. Г. Григорьева сума суса йĕркеленĕ асăну кунĕнче район пуçлăхĕн социаллă ыйтусемпе ĕçлекен çумĕ И. В. Степанов, Мăн Шетмĕ ял тăрăхĕн пуçлăхĕ П. И. Николаева, районти тавра пĕлÿçĕсен ертÿçи В. З. Константинов, Мăн Шетмĕ тăрăхĕнчи ветерансен канашĕн пуçлăхĕ И. И. Ильин, районти историпе краеведени халăх музейĕн директорĕ В. С. Серафимов, шкул директорĕн çумĕ Ф. П. Петрова тухса калаçрĕç. Зала пухăннисем мухтавлă ентешĕмĕре — Четрикри А. Г. Григорьев профессора сума суса пĕр минут хушши шăп тăчĕç.
В.Захаров
Çыпăçтарнисем: |
