Чăваш кĕнеке издательствинче иртнĕ уйăх вĕçĕнче кăна çĕнĕ кĕнеке пичетленсе тухнă: “Чăваш литературин антологийĕ (ача-пăча валли çырнă хайлавсем)”. Редакци коллегийĕн йышĕнче паллă филологсемпе çыравçăсем тата тĕрлĕ шайри ертỹçĕсем: С. Л. Павлов, В. П. Комиссаров, И. В. Софронова, В. Г. Родионов, В. Н. Алексеев, Д. В. Гордеев, Р. В. Сарпи, А. И. Мефодьев, Н. П. Ишентей, И. Ю. Кириллов, Г. П. Соловьева. Пухса хатĕрлекенĕ — филологи ăслăлăхĕсен кандидачĕ И. В. Софронова доцент. Ум статйине те вăлах çырнă. Кĕнеке чăваш ача-пăча литературин аталанăвне туллин уçса парать. Унта XIX—XXI ĕмĕрсенчи чăваш çыравçисен ачасемпе çамрăксем валли çырнă чи лайăх хайлавĕсем кĕнĕ. Пĕтĕмпе 180 ытла автор пултарулăхĕпе паллашма пулать. Антологире сăвăсем, юптарусем, калавсем, вăйăсем, шỹтсем, юмахсем, повеçсемпе пьесăсен сыпăкĕсем пичетленнĕ. Хайлавсен пуххине Трак енрен тухнă 14 çыравçăна кĕртнĕ: вĕсен кĕске биографийĕсемпе сăнỹкерчĕкĕсем пур. Çав йышра: Мĕтри Ваçлейĕ (Çирĕклĕ), Нестер Янкас (Янкас), Филипп Андреев (Кĕрекаç), Зоя Нестерова (Анат Кушар), Владимир Харитонов (Пайсупин), Юрий Вирьял (Еншик), Геннадий Юмарт (Кайри Карăк), Юрий Сементер (Танăш), Николай Карай (Карай), Ăсан Уçăпĕ (Санькасси), Исмай Исемпек (Кĕçĕн Чуллă), Борис Романов (Кивĕ Йĕкĕт), Александр Пăртта (Туçи Чуракасси), Петĕр Яккусен (Упаçырма).

Н. Ершов