Раштав уйăхĕн 23-мĕшĕнче Трак ен тĕп вулавăшĕнче  Нестер Янкас ячĕллĕ пĕрлĕх правленийĕн анлă ларăвĕ иртнĕ. Унта правлени пайташĕсемсĕр пуçне Нестер Янкас ячĕллĕ Преми лауреачĕсемпе пĕрлĕх хастарĕсем хутшăннă. Ларура пĕрлĕх правленийĕн председателĕ Иван Прокопьев-Чураль пĕрлĕхĕн 2021 çулхи  ĕç-хĕлĕ çинчен отчёт тунă, унăн çумĕ Виталий Михайлов-Чунтупай, Красноармейски районĕн статусĕ округа куçнă май, пĕрлĕхĕн Уставне улшăнусем кĕртесси çинчен тата пĕрлĕхĕн укçи-тенки епле пухăнса пынипе тăкаклани çинчен отчёт туса панă. Асăннă ыйтусемпе тивĕçлĕ йышăну тунă. Кунсăр пуçне пухăннисем 2021 çулшăн Преми лауреачĕсене палăртассипе тата Нестер Янкас вулавĕсем ирттерессипе çыхăннă ыйтусене сÿтсе явнă. Юлашкинчен  лару район администрацийĕн пуçлăхне Александр Кузнецова "Чăвашлăха аталантарнăшăн" ("За развитие чувашской культуры") медальпе чыслама йышăннă.