Янкас тӑрӑхӗнчен наука ҫыннисем кӑна мар, литературӑпа искусствӑра тата культурӑра хисеплӗ ятсем илнӗ чылай ҫын тухнӑ. Поэтсенчен чи паллисене Чӑваш ҫӗр-шывӗнче аван пӗлеҫҫӗ: Марк Аттай (ҪӗньялУпи), Нестер Янкаспа Вениамин Пехил (Янкас) тата Борис Романов (Кивё Йӗкӗт). Халӗ вёсенчен пӗри те пирӗн хушӑмӑрта ҫук. Вёсен пурнӑҫё питӗ кӗске пулнӑ пулин те, халӑх асӑнса пурӑнмалӑх вилӗмсӗр хайлавсем ҫырса хӑварнӑ. Тӑван енре ентеш-ҫыравҫӑсене манмаҫҫӗ — юбилейӗсене паллӑ туса чыслаҫҫӗ. Ҫакӑн евӗр чыслав  Янкасри вулавӑшра иртрӗ. Ӑна Борис Романов ҫуралнӑранпа 65 ҫул ҫитнине халалланӑ. Ҫавна май кунта ку тӑрӑхри 5 ял ҫыннисене чӗннӗ. Пухӑннисем чи малтанах "Ячӗ халӑх асӗнче" ярӑма пӗрлештернӗ кӗнекесен, сӑвӑ ярӑмӗсен, сӑн ӳкерчӗксен куравӗпе паллашрӗҫ. Библиотека ӗҫченӗ Г. Ильина "Ҫеҫпӗл сассиллӗ сӑвӑҫ" ятпа электронлӑ презентаци йӗркелесе ирттерчӗ. Поэт кун-ҫулӗпе творчествӑри пултарулӑхне асра хӑварма тесе литература викторини пулчӗ. Ершов-Янгер поэт Борис Романовăн поэзири иксӗлми талантне анлӑн ҫутатса пачӗ. Хӑй унпа пӗрле ӳссе аталанни, вӗренӳре, пултарулӑх лаҫҫинче хутшӑнса ӗҫлени пирки тӗплӗн каларӗ, хӑйӗн архивӗнче ун ҫинчен упранакан хаклӑ документсене кӑтартрӗ, Борис Романова халалланă сӑввине вуларӗ.

Чыслава килнисем хушшинче поэтӑн вӗрентекенӗсем те пур. В. А. Правдинапа Ю. Н. Ефремова педагог-ветерансем Бори Романовăн Янкас шкулӗнч палӑрнӑ саманчӗсене, унӑн кӑмӑл-туйӑмӗсене, литературӑри пултарулӑхне ас илсе пысӑк хак пачӗç.

Н.Васильев