Тепĕр уйăхран, юпан 26-мĕшĕнче, Чăваш наци конгресĕн черетлĕ Аслă пухăвĕ иртмелле. Унта Раççейĕн тĕрлĕ тăрăхĕсенчи пĕрлешӳсем пухăнмалла, конгресс умĕнче тăракан ыйтусене сӳтсе явмалла.
Анчах, сасăлава пурне те кĕртесшĕн мар иккен. Пĕтĕм чăваш халăхне пĕрлештерме йĕркеленĕ Чăваш наци конгресĕн Аслă пухăвĕнче депутат вырăнĕсене «Сăвар» чăваш çамрăкĕсен пĕрлешĕвне (элтеперĕ Арăслан Наумов; хисеплĕ элтеперĕ Ультиар Цыпленков) парасшăн мар. Çапларах ЧНК президиум пайташĕ Михаил Краснов хуравланă. Хăйĕн хуравне вăл «Сăвар» пĕрлешӳ юстици министерствинче перерегистраци урлă тухманнипе тата депутатсене тăратма пултаракан пĕрлешӳсен йышĕнче «сăварсем» çуккипе сăлтавланă. 
Олег Михайлович каланă тăрăх депутатсем пулма çав-çавах чылай регистрациленмен пĕрлешӳсене кĕртнĕ, çавăнпа Михаил Николаевич вăл йĕркеленĕ организацие сăлтавсăр пăрса хăварни туйăнать. Пирĕн шутпа та пĕтĕм халăх интересĕсене хӳтĕлекен конгресс обществăри пур ене сăнлакан организацисене — чăвашлăхшăн тăрăшаканнисене пушшех те —кĕртме тивĕç. Унсăрăн конгрес ĕçĕ халăхăн пĕр пайне кăна çутатнăн туйăнĕ.