Чăваш — мĕн тери вăл юмарт, çутă кăмăллă, иксĕлми вăй-халлă. Унăн пултарулăхĕ яланах çăлкуç пек тапса тăрать. Чăваш çынни ĕçчен, хастар, яланах ырă ĕçсем тума тăрăшать. Пирĕн ентеш Геннадий Федорович Юмарт (Трофимов), çакăн пек чăваш йăхĕнчен тухнăскер, кĕçех 75 çул тултарать. Чăваш халăхĕн мухтавлă ывăлĕ паянхи кун та чунне парса тăван халăх культуришĕн, чĕлхе аталанăвĕшĕн пысăк пĕлтерĕшлĕ ĕçсем тăвать. Вăл — чăваш халăх сăмахлăхне пухса тĕпчекен, сăвăçă, куçаруçă.
Пултаруллă ентешĕмĕрĕн юбилейне халалласа, унăн ĕçĕсен пĕлтерĕшне пĕтĕмлетсе чăваш филологийĕпе культура факультечĕн сумлă вĕрентекенĕсем, студенчĕсем паян, акан 19-мĕшĕнче, К.И.Иванов тĕпелĕнче поэзипе чăваш тумĕн уявне йĕркелерĕç. Уява И.И. Иванов доцент ертсе пычĕ. Г. Юмарт пурнăçĕпе пултарулăхĕ пирки факультет ĕçченĕсем каласа пачĕç. Пĕрремĕш курс студенчĕсем вара поэтăн сăввисене вуларĕç. Геннадий Юмартăн поэзийĕ чăвашăн аваллăхĕнчен тухса тăрать, этемĕн кăмăл-сипечĕ пирки шухăша кайни тĕп вырăн йышăнать унта. Чăваш тумне тăхăннă яш-кĕрĕм хăйсем çырнă сăввисене те вуларĕ уявра, чăваш ташшипе те савăнтарчĕ. 
Факультетра И.Я. Яковлев вĕрентекенĕмĕр çуралнăранпа 165 çул çитнине уявланă май чăваш халăхĕн паянхи маттур сăвăçине чыслани те питĕ пысăк пĕлтерĕшлĕ. Шăпах çавăн пек сăвăçсем, тĕпчевçĕсем тĕнчене килччĕр тесе вăй хунă-çке пирĕн мухтавлă çутлăхçă.