Фоторепортаж

Çу 24-мĕшĕнче, Чăваш наци вулавăшĕнче «Çăлтăрпа çуралнă ĕмĕт» кĕнекен хăтлавĕ иртрĕ. Ку кĕнеке ытти кĕнекесенчен унăн авторĕсем шкул ачисем вĕрентекенсем пулнипе уйрăлса тăрать.

Chuvash.Org пĕрлĕх чăваш ачисемпе вĕрентекенсем хушшинче 2008 çултанпа литература ăмăртăвĕсем ирттерет. Маларах «Асамлăх çулĕ» (2010), «Урхамахсем тăраç тапăртатса» (2011) кĕнекесем кăларнăччĕ — вĕсенче чи пирвайхи фантастика конкурсне тата «Халап хапха тăрринче...», «Урхамахсем тăраç тапăртатса...» литература ăмăртăвĕсене хутшăннă хайлавсем пичетленчĕç. Ку кĕнекене вара 2011 çулхи «Ĕмĕтсен çăлкуçĕ» тата 2012 çулхи «Ăраскал çăлтăрĕ» конкурссене ярса панă пултарулăх ĕçĕсем кĕнĕ.

Кĕнеке пирки ăна пухса кăлараканĕ Николай Плотников, редакторĕ Алина Сосаева тата ыттисем — шкул ачисем те, вĕрентекенсем те — тухса калаçрĕç. Конкурса йĕркелекенсем кашни автора тин çеç тухнă кĕнекене парнелерĕç.

Авторсем хушшинче пирĕн районти шкулсенче вĕренекенсем те пур. Вĕсем ытларах Красноармейски шкулĕнчен пулчĕç. Унти "Кăмăл" вĕренÿ ушкăнне çÿрекенсен 10 калавĕ пичетленнĕ унта. Кружок ертÿçин З.П.Михайлова вĕрентекенĕн те икĕ калавĕ пур.