Ыран, юпан 26-мĕшĕнче, К.В. Иванов ячĕллĕ Чăваш патшалăх академи драма театрĕнче Чăваш наци конгресĕн VIII Аслă Пухăвĕ пулать. Унăн ĕçне 300 яхăн делегат тата 250 яхăн хăна хутшăнмалла. Съезд 11:00 сехетре пуçланать.
Кун йĕркинче Чăваш наци конгресĕн президиумĕ VII-мĕш съезд хыççăн ирттернĕ тата малашне тумалли ĕçсене сӳтсе явĕç, ревизи комиссийĕн отчётне итлĕç. Аслă Пуху йышăнмалли хăш-пĕр документсемпе вĕсен
сайтĕнче паллашма пулать.
Чи пĕлтерĕшлĕ ыйтусем хушшинче ЧНК Президентне суйласси пулĕ. Çĕнĕ ертӳçĕпе халăх ЧНК ĕçĕнче улшăнусем пуласса кĕтет. Чăваш наци конгресĕн ертӳçисем çакăнпа килĕшеççĕ-килĕшмеççĕ-и, анчах мĕн пытармалли пур — халăх вĕсен ĕçне пысăках хакламасть. Кăна эпир маларах ирттернĕ ыйтăм та çирĕплетет. «ЧНК ĕçĕ-хĕлĕ сире тивĕçтерет-и?» ыйту çине 30 ытла çынран 2-мĕшĕ кăна тивĕçтерет тесе хуравланă, ыттисем вара япăх ĕçленине тата ĕçне лайăхлатмалли пирки пĕлтернĕ.
Президент вырăнне йышăнмалли кандидатсен йышĕнче хальлĕхе тăватă çынна палăртнă: Клементьев Валерий Леонидович (юрăç, усламçă, хальхи вăхăтра ЧНК Президенчĕн ĕçне пурнăçлакан); Лукианов Николай Егорович (юрист, ЧАП партине йĕркелеме хутшăннисенчен пĕри); Портнов Константин Петрович (ЧНК ĕçтăвком ертӳçи); Тимĕр Тяпкин («Сăвар» Чăваш наци культурин аталану фончĕн ертӳçи). Сас-хура пĕлтернĕ тăрăх влаç тытăмĕнчи тӳре-шара ЧНК ертӳçинче
Угаслов Николай Фёдоровича курасшăн. Чăннипе, миçе кандидат пулассине Аслă Пухура пĕлтерĕç пулас, ЧНК сайтĕнче кун пирки информаци çук. Хăвăр кама кăмăлланине вара эсир пирĕн сайтри ыйтăмра пĕлтерме пултаратăр. Тимĕр Тяпкинсăр пуçне — ун пирки информаци ыйтăма уçнă хыççăн çеç çитрĕ — пур кандидата та унта палăртнă.
