Михаил Тимофеевич Тимофеев (Шетмĕ Михали) Кĕçĕн Шетмĕ ялĕнче 1933 çулхи июнĕн 29-мĕшĕнче çуралнă. Кăçал ятлă-сумлă сăвăç 80 çулхи юбилейне паллă тума хатĕрленет. Чăваш чĕлхин кунĕ умĕн вара Трак вăтам шкулĕн 6-мĕш "Б” класĕнче вĕренекенсем (ертÿçи Ю. Кузьмина) Красноармейскинчи историпе тавра пĕлÿ халăх музейĕнче Шетмĕ Михалипе тĕл пулчĕç.
Унăн пурнăçĕпе, ĕçĕ-хĕлĕпе тата пултарулăхĕпе пуçтарăннисене малтанах районти тĕп вулавăш ĕçченĕ С. Гурьева паллаштарчĕ. Иртнĕ çăмăл мар пурнăçне Шетмĕ Михали хăй те аса илчĕ. "Çамрăклах нумай нуша курнăран çын пулас килчĕ. Лăпă çыхма, кăмака тума вĕрентĕм. Сăвă та çырса пăхрăм. "Аслă Сталин” ятлине стена хаçатĕнче вырăн пачĕç. Ку татах та хавхалану çуратрĕ. Район хаçатĕнче вара пĕрремĕш сăввăм 1956 çулта кун çути курчĕ. Каллех савăнтăм. Кăмăл-туйăм çĕнĕрен те çĕнĕ хайлавсем çырма хистерĕ. "Пулăç пулла каймасăр, сăвăç сăвă çырмасăр пурăнаймасть” тенешкел пĕрин хыççăн тепри шăрçаланма тытăнчĕç”, — терĕ Михаил Тимофеевич.
Шетмĕ Михали сăвăçпа туслă та ĕçлĕ çыхăну тытни пирки тĕл пулура ачасене Н. Ершов-Янгер сăвăç, ЧР культурин тава тивĕçлĕ ĕçченĕ И. Степанов композитор (унăн сăввисемпе 15 юрă, çав шутра "Шăпчăк юррине тăнларăм” ятлине те, кĕвĕленĕ), Красноармейскинчи историпе тавра пĕлÿ халăх музейĕн заведующийĕ В. Серафимов, районти Н. Янкас ячĕллĕ пĕрлĕх ертÿçи Г. Ефимов-Тусли, райхаçатăн пай редакторĕ В. Данилов каласа пачĕç.
Юлашкинчен музей ĕçченĕ В. Тихонова Шетмĕ Михали сăвăç пурнăçĕпе пултарулăхĕнчи ыйтусемпе викторина ирттерчĕ. Çĕнтерÿçĕсем парнесене тивĕçрĕç.

Д. Викторов