 Раççей Писателĕсен тата Журналисчĕсен союзĕсен членĕ, ЧР хисеплĕ тавра пĕлÿçи, халăх ăсчахĕ, 17 кĕнеке авторĕ, тĕрлĕ премисен лауреачĕ К. Шачкин çуралнăранпа кăрлач уйăхĕн пуçламăшĕнче 80 çул çитрĕ. Вăл — пирĕн ентеш, Именкасси çынни. Çак кунсенче вара ялта пурăнакан çыравçăна ял-йыш чысларĕ. Çав ятпа тăван шкулта савăнăçлă тĕл пулу иртрĕ. Юбилей уявне Именкассинчи тĕп библиотекарь И. Егорова уçса йĕркелесе пычĕ. Чи малтанах сăмах шкул директорне — О. Арманована пачĕç. Вăл экран çине черетленсе тухса пыракан электронлă курав умĕнче прозаикăн, поэтăн, çĕр ĕçченĕн, çут çанталăк тусĕн, спортсменăн нумай енлĕ таланчĕ пирки каласа кăтартрĕ. Константин Филипповича ахальтен мар иртнĕ çул Еншик Чуллă ял тăрăхĕн хисеплĕ гражданинĕн ячĕпе чысларĕç. Юбиляра район администрацийĕн пуçлăхĕ А. Шестаков алă пуснă Тав çырăвне, шкул дирекцийĕн хисеп хутне, парне пачĕ. Еншик Чуллă ял тăрăхĕнчи информаципе культура центрĕн ертÿçи С. Михайлова вырăнти администраци пуçлăхĕ А. Тихонова ячĕпе саламласа хисеп хучĕпе чысларĕ. Именкасси тăрăхĕнчи ветерансен канашĕн ертÿçи Т. Александрова, тус-юлташĕсенчен Йÿçкассинчи К. Тимофеев Константин Филиппович пирки ăшă сăмахсем каларĕç. Юбиляра саламлама район центрĕнчен те творчество çыннисен ушкăнĕ килнĕ. Н. Янкас ячĕллĕ литературăпа искусство тата культура пĕрлĕхĕн хисеплĕ председателĕ Н. Ершов, музыка обществин уйрăмĕн ертÿçи Н. Никоноров, ĕçпе вăрçă ветеранĕсен районти канашĕн председателĕ Г. Ефимов К. Шачкин çамрăк ăру валли иксĕлми пуянлăх хатĕрлесе панине пысăка хурса хакларĕç. Еншик Чуллăри кану центрĕнчи, Именкасси шкулĕнчи учительсен тата вĕренекенсен пултарулăх ушкăнĕсем хаваслă юрă-кĕвĕпе, ташăсемпе савăнтарчĕç. Çав шутра К. Шачкин сăввисем те, унăн сăмахĕсемпе çырнă юрăсем те янăрарĕç, ăна халалланă сăвăсем те пулчĕç. Хăйне çапла сума суса ăшă тĕл пулу йĕркелекенсене, унта пынă çынсене пурне те юбиляр чĕререн тав турĕ, ăнăçусем сунчĕ. Н. Васильев
Çыпăçтарнисем: | 
