Ака уйăхĕн 1-мĕшĕнчен республикăри “Литературăллă Чăваш Ен: çулталăкри чи вуланакан кĕнеке” фестиваль-конкурс шучĕпе Трак енре “Юрий Сементере вулатпăр” литература акцийĕ старт илчĕ. Литература конкурсне ентеш-сăвăçăн “Ỹнер ĕшни” тата “Огнецвет” кĕнекисем хутшăнаççĕ. Акци тĕллевĕ — Ю.С. Семенов-Сементер творчествине кĕçĕн çулхисем, яш-кĕрĕм тата аслисем хушшинче сарасси. Юрий Сементер — чăваш халăх поэчĕ, куçаруçă, ЧР культурăн тава тивĕçлĕ ĕçченĕ, Трак енĕн хисеплĕ гражданинĕ, тĕрлĕ премисен лауреачĕ. Вăл сăвăсемпе поэмăсен 50 ытла кĕнекисен авторĕ. Унăн хайлавĕсене тĕнчери çирĕм ытла чĕлхене куçарнă. Эпир ăна поэт-юрăçă пулнипе те аван пĕлетпĕр. Шывпуçĕнчи ялти вулавăш асăннă акцине хутшăнать. Кунта вĕренекенсем унăн сăввисене вулама пуçларĕç, поэт кĕнекисен куравĕ ĕçлет, унăн сăввисемпе кĕвĕленĕ юрăсем янăраççĕ.