Красноармейски районĕн тĕп библиотекин вулав залĕнче Н. Янкас ячĕллĕ пĕрлĕхĕн  черетлĕ ларăвĕнче Н.Янкас ячĕллĕ пĕрлĕх йĕркеленнĕренпе 20 çул тултарнине тĕплĕн хатĕрленсе кĕтсе илес ыйтăва пăхса тухнă. 

Сăмах май, 1989 çулхи декабрĕн 22-мĕшĕнче районта Н.К.Ефимов (Янкас) поэт ячĕллĕ культурăпа искусство тата литература пĕрлĕхне туса хунă. Ун чухне унăн правлени йышне 11 çынтан, ревизи комиссине 3-рен тата правлени председателĕ пулма Анатолий Антонович Раськин (Раскай) тухтăр-сăвăçа суйланă пулнă.

Пĕрлĕхĕн Уставĕпе Преми положенийĕ «Ял пурнăçĕ» хаçатăн 1990-мĕш çулхи 6-мĕш номерĕнче çапăнса тухнă.

Н.Янкас пĕрлĕх ларăвĕнче юбилей уявне 2010 çулхи февралĕн (нарăсăн) 25-мĕшĕнче, кĕçнерни кун, каçхине районти Халăх пултарулăх çуртĕнче ирттерме йышăннă. Унта лауреат ята илнĕ 9  пултарулăх коллективĕ тата уйрăм юрăçсемпе ташă ăстисем хăйсен ăсталăхне кăтартаççĕ.

Ларура правлени председателĕ Г.Ефимов-Тусли, правлени членĕсем С.Гурьева библиотекарь, культура ĕçченĕсем  А. Алексеев, Н.Никоноров тата Л.Антонов (Малтикас), Н.Ершов (Янкер) сăвăçсем тухса калаçнă. Унпа пĕрлех çитес ларура пĕрлĕхĕн ĕç планне  пăхса тухса çирĕплетме палăртнă.