Темшĕн халăхра çемье вучахне хĕрарăмăн упрамалла, çемьери «çанталăк» та пĕр унран кăна килет текен шухăш сарăлнă. Анчах çаплах-ши? Çемье лавне пĕччен мар, иккĕн туртмалла теççĕ-çке-ха, апла-тăк «çанталăк» мĕнле пуласси арçынран та килет. Паян эпир хамăр страницăра упăшкана та «пурăнма» вĕрентесшĕн. Унăн мĕн асра тытмалла-ха?
1. Хĕр чухне хĕрĕх тус, авланиччен аллă теççĕ, апла авланиччен санăн та чун савнисем пĕрре мар пулнă. Анчах кун çинчен арăма мĕншĕн пĕлтермелле?
2. Арăм ачана мĕнле воспитани пани, кил-çурта мĕнле тытса пыни питех килĕшмест пулсан, шыв сыпнă пек ан çӳре, пĕрле ларса сасă хăпартмасăр лăпкăн калаçăр.
3. Арăм ытла мăнтăрланса е ырханланса кайни çинчен вара кашни кун аса илтерме ан васка. Ун вырăнне вăл мĕншĕн мăнтăрланса е çӳхелсе кайнин сăлтавне ăнланма тăрăш.
4. Ĕçри хĕрарăм сирĕнпе куç хĕсмелле вылянине те арăм пĕлмесен лайăхрах. Унсăрăн аçа çиçĕм çиçесси инçе мар.
5. Ĕçри йывăрлăх, кăмăлсăр лару-тăру пулчĕ-тĕк, çакна арăмпа çийĕнчех сӳтсе явсан аванрах пулĕ. Лайăх арăм упăшкана яланах ăнланма, йывăр вăхăтра пулăшма хатĕр вĕт.
6. Çемье бюджечĕ – çветтуй япала. Çавăнпа хĕрринчен кĕрекен укçана арăмран пытарсан, каçарасса ан шутла. Çавăнпа тĕрĕсне тӳрех кала, укçине алăран тыттарсан тата лайăхрах.
7. Тепĕр тĕп правило: арăмна мĕнле юратнине кашни кун пĕлтер.
■ Ирина КУЗЬМИНА.
хатĕрленĕ.