 Чăваш Республикин наци вулавăшĕнчи «Чăваш кĕнеки» центрĕнче Чăваш таврапĕлӳçĕ пĕрлĕхĕн канашĕн ларăвĕ иртрĕ. Кун йĕркипе килĕшӳллĕн унта темиçе ыйту сӳтсе яврĕç: чăваш таврапĕлӳçисен Х съездне 2012 çулхи пушăн 23-мĕшĕнче ирттересси; пухăва хатĕрленмелли ĕçсене палăртасси; тăван тавралăх çинчен чи лайăх кĕнекесене конкурса тăратасси.
Чăваш таврапĕлӳçисен союзĕн хисеплĕ ертӳçи, И.Я. Яковлев ячĕллĕ Чăваш патшалăх педагогика университечĕн вĕрентекенĕ, филологи ăслăлăхĕсен кандидачĕ В.П. Станьял районсенче иртекен таврапĕлӳçĕсен конференцийĕсенче ял, район тата хула шкулĕсенчен, Пултарулăх çурчĕсенчен, музейсенчен, клубсенчен, вулавăшсенчен съезда килме делегатсем суйлама сĕнчĕ. Ларура Чăваш Енĕн ăслăлăхпа ӳнер академийĕн Президиумĕн членĕ С.Г. Отрыванов тухса калаçрĕ. Вăл таврапĕлӳ ĕçĕнчи йăласене сыхласа хăварас енĕпе халăх академикĕсемпе таврапĕлӳçĕсен пĕрле ĕçлемелли çинчен каларĕ. Наци вулавăшĕн «Чăваш кĕнеки» центрĕн ертӳçи Г.П. Соловьева тăван тавралăх çинчен çырнă кĕнекесен конкурсне хутшăнма таратнă кăларăмсемпе паллаштарчĕ.
Чăваш таврапĕлӳçисен пухăвĕ пушăн 23-мĕшĕнче Наци вулавăшĕнче пулать. 11 сехетре пуçланать. Унта тăван енĕн иртни, паянхи тата пуласлăхĕ кама пурпĕрех мар, çавсене пурне те йыхравлаççĕ.
Çыпăçтарнисем: |
