Тин кăна чăваш кĕнеке издательствинче çĕнĕ кĕнеке пичетленсе тухрĕ — Г.А. Дегтярёв хатĕрленĕ «Изучаем чувашский язык» пособи. Малтантарах ку кĕнеке 1995 çулта пичетленсе тухнăччĕ — халĕ вара, иккĕмĕш кăларăмпа тухнă май, автор ăна самай çĕнетнĕ. Çĕнетӳсем чылай — кĕнекене кĕртнĕ сăвă тĕслĕхĕсен пурин те тенĕ пекех чăвашларан вырăсла куçарнă варианчĕсем вырнаçнă; умсăмахĕ çĕнелнĕ. Кĕнеке хальхилле пичетленĕ — ăна алла тытма та питĕ кăмăллă. Тата саспаллийĕсем те малтанхи пек вĕтĕ-вĕтĕ мар — шултра.

Кĕнеке рецензенчĕ — Атнер Петрович Хусанкай. «Хальхи нумай-нумай культурăллă аслă тĕнчере çĕтсе каяс мар тесен пире мĕнле те пулин хатĕр кирлĕ. Чĕлхе вара — шăп та лăп çавнашкал хатĕр, тĕнчене туйма пулăшакан çăраççи», — тет вăл хăйĕн умсăмахĕнче.

Мĕнех, чăваш чĕлхине вĕренме кăмăллакансем валли çĕнĕ кĕнеке тухни питĕ лайăх! Чăвашла пĕлмен тусăрсене ăна парнелеме ан манăр — тепрехинче вĕсем патне хăнана кайсан чăвашла пуплешме те пултаратăр.